作者 arm arm 係某大型超市買完野，唔要膠袋徒手拎返公司後忽發奇想 (其實係食飽冇事做)。記著，以下純屬亂寫，家中的小朋友千萬不要學。
---
買魚蛋記：
西裝友：黑仔記，20 蚊魚蛋唔該。
魚蛋強：好，四串。
(拮拮拮拮，四串魚蛋登場)
西裝友：(望住四串魚蛋唔知點算) 死黑仔有冇袋呀。
魚蛋強：冇喎，家陣下下畀膠袋要收5 毫子，十九幾萬個客一下子我唔記得收一個我邊有錢畀廿萬，冇派袋好耐喇。
西裝友：我要拎返公司，咁拎法我套阿嗎理冇緊啦，有冇計呀，冇話唔畀錢喎，今時今日咁既服務態度點得架。(劉華貌)
魚蛋強：有，拿，攞去。(遞上一個超大發泡膠盒)
西裝友：嘩... 唔洗咁大個呀，幾錢呀。
魚蛋強：呢個好野呀，one size，大量訂購仲平過膠袋，唔洗收你錢。
西裝友：咁好？
魚蛋強：係呀，大到放得落兩個橙都係 1 毫，抵過用膠袋，仲有網上訂購包送貨 tim。
路人甲；老細，6 串魚蛋 畀個盒唔該。
魚蛋強：(對住西裝友講) 你睇，生意仲好左 tim。
---
超市減價戰：
收銀甲：師奶，你要唔要膠袋？
師奶甲：要呀，唔記得帶環保袋。
收銀甲：啊，多謝 $57.5 (轉大聲) 其中 5 毫子係膠袋稅 (又轉返平時聲量) 我地超市做緊 promotion，每 $50 減 5 毫。
(收銀後走人，下個師奶)
收銀甲：師奶，你要唔要膠袋？
師奶乙：唔洗，我有帶袋。
收銀甲：多謝 $274.5 (轉大聲) 因為唔要膠袋唔洗收多 5 毫。
師奶乙：喂，唔係每 $50 減 5 毫咩？
收銀甲：係呀，不過因為係外來袋，我地公司要收返 5 毫子入袋費。
師奶乙：有冇搞錯呀你地，唔係推環保咩。
收銀甲：推呀，可以買埋我地既環保袋，每個 $20，下次帶返黎咁就唔洗收入袋費。
師奶乙：我呢個唔係環保袋咩？ (怒)
收銀甲：係呀，不過係隔離超市既，公司 policy 話用外來袋就要收費。
師奶乙：你倒返晒佢出黎我自己入！入袋費丫拿。
(收銀甲照做....)
---
袋的記錄：
某娛樂場所顧客：小姐，帶袋呀。
某娛樂場所客服：好，要收多 5 毫子喎。
某娛樂場所顧客：咁平？
某娛樂場所客服：額外再收呀，唔好以為唔洗畀。
某娛樂場所顧客：喂，咁都算？！
某娛樂場所客服：我點知政府要唔要所有膠造既袋都要收呀，公司規定呀。
某娛樂場所顧客：okok，唔好破壞氣氛。
某娛樂場所客服：係喎仲有，公司規定要記錄收左膠袋稅既錢，先生畀張身份證黎抄低個名。
某娛樂場所顧客：喂...
---
相關新聞：
明報新聞網 -- 膠袋費09年實施拒付可判囚 條例草案今刊憲 大型超市便利店先推行
蘋果日報 -- 購物膠袋徵費料 09 年實施
沒有留言:
發佈留言